Xan Guindán foi ao muiño

coa pelica na cabeza

esvaráronlle as chanquiñas

e caiu co cu na présa

Miña nai por me casar

ofreceume bois e vacas

e agora que me casei

deume unha taza de papas

Ese que anda no baile

ten o bailar peneireiro

Dálle media volta á perna

para que lle ruxa o diñeiro

Pasei a Ponte de Ourense

paseina na carreiriña.

Tirei un tiro a unha lebre

matei unha costureiriña

O cura e máis a criada

ordenaron de cocere

a leña estaba no monte

e a fariña por moere

A miña sogra morreume

e enterreina no palleiro

deixelle o brazo de fóra

pra que tocara o pandeiro

Se queredes que vos cante

habédesme dar diñeiro

porque a miña gargantiña

non ma fixo un carpinteiro

Eu pedinlle a unha nena

ela non mo quixo dar

Eu pedinllo, ela deumo

e non hai máis que falar

Miña sogra din que é bruxa

heina de facer rabiar

Nin lle m'hei casar co fillo

nin llo hei deixar casar

Miña nai ten unto vello

dos porcos que ha de matare

tamén ten berzas na horta

das coles que ha de sembrare

Sei cantar e sei bailar

tamén sei pinta-lo mono

Son filla dunha viúda

teño que saber facer de todo

Se queres que o carro cante

móllale o eixo no río

verás como de mollado

canta coma un asubío