O proxecto trata de mesturar a música tradicional galega con ritmos electrónicos e pop contemporáneos. "A súa música baséase en coleccións, un traballo feito coa colaboración de moitas mulleres que desinteresadamente axudan a dar a coñecer e preservar a riqueza da música e tradición galega", explican dende a organización do evento.

Tamén aseguran que o estilo de Alana está moi marcado pola importante presenza da percusión tradicional nos seus directos, así como por melodías que convidan a bailar en todo momento. Na súa curta vida formaron parte de espazos como a Foliada da Fonsagrada ou a Muiñada de Vimianzo e son os gañadores dos Premios Xuventude Crea 2023 na categoría de música.