Historia / cronoloxía:

Construída entre a 2ª e a 3ª década do século XX e reformada en febreiro de 1934, pertencía á Sociedad de Agricultores y Canteros "El Ideal” do lugar, afiliada á CNT dende 1933, e integrada na “Federación de Agricultores y Obreros del Ayuntamiento de Cerdedo” (CNT). É unha casa duns 60 m2.

As obras foron dirixidas polo canteiro José Gómez Garrido (1850-1932), natural de Santa Baia de Castro e concelleiro agrario de ideario republicano e socialista, a quen se debe tamén a fonte emprazada ao seu carón e a traída de augas; nelas, colaboraron 28 familias do lugar.

Incautada polos falanxistas, pasou á propiedade da CNS e foi inscrita como tal no rexistro da propiedade de A Estrada. O 25/09/1972 foi adquirida pola Hermandad Sindical Local de Labradores y Ganaderos de Cerdedo, para instalar alí unha Casa de Hermandad.

Nos anos 80 foi traspasada á Xunta e logo ao Concello, que a cedeu en uso aos veciños do lugar.

Nela, durante a IIª República deu clases á veciñanza o profesor e escritor Xosé Rogelio Otero Espasandín, falecido nos EEUU no exilio.